CEBU, Philippines - Patay diha-diha ang usa ka batan-on human kini gipusil sa sitio Lubi barangay Canulao dakbayan sa Lapulapu sa milabay’ng gabii. Ang biktima mao si Eddie Villastrobos, 19, residente sa maong dapit samtang ang gitumbok nga responsable sa pagpamusil mao sila ni William Putot, 43, ug Edgar Putot, 20, ug mga residente usab sa maong dapit.
Base sa pasiunang imbestigasyon sa kapolisan nasuta nga samtang naglakaw ang biktima sa maong dapit gisugat kini sa duha ka mga suspek dayong pusil ngadto kang Villastrobos.
Si Villastrobos samaran sa iyang dughan gikan sa wala pa matinong kalibre sa armas nga maoy nakaingon sa hinanali niining kamatayon. Bisan pa sa pagsuway og ikyas nila ni William ug Edgar nasikop kini sa mga operatiba sa kapolisan ug gibilanggo sa Lapulapu City Police Office.
Naglibog usab ang kapolisan sa motibo sa manag-ig-agaw nga Putot sa pagpusil sa biktima. Kasong Murder ang ipasaka batok sa manag-agaw Putot gumikan sa ilang pagpusil patay ni Villastrobos. (BANAT NEWS)