CEBU, Philippines - Usa ka dalagitang armado gisikop sa kapolisan didto sa baybayon sa barangay Jubay, lungsod sa Lilioan sa miaging gabii.
Ang suspetsado usa ka 17 anyos nga dalagita nga molupyo usab sa maong dapit.
Sa akto nga gisikop ang suspetsado uban sa pagsakmit sa gitangkil niyang .38 kalibreng revolver, may mga kauban usab kining mga babaye ug mga lalaki sa maong lugar.
Si SPO2 Remegio Ilacion sa kapolisan sa nahisgotang lungsod nga nahinabi sa Banat News miingon nga sayo niini nakadawat sila og taho gikan sa usa ka nagpakabanang molupyo ug misumbong kalabot sa nakita nilang babaye nga nagtangkil sa hawak og armas de fuego.
Gialarma dayon sa kapolisan ang maong hitabo ug milihok dayon sila aron sa pagsusi niini sa pagpanguna ni SPO1 Ricardo Enriquez kinsa miadto sa nahimutangan sa suspetsado. Diha-diha nasuta sa kapolisan ang .38 kalibre nga kargado sa bala nga gitangkil sa hawak sa dalagita.
Uban sa ilang pagsakmit niini, gidala usab dayon sa kapolisan ngadto sa karsel ang suspetsado.
Hinuon tungod kay menor de edad gawasnon siya kay dili pa siya ikabalhog sa prisohan gumikan sa iyang edad.
Dihang gisukit sa kapolisan, mitug-an ang suspetsado nga nagdala siya og armas de fuego kay iyang ipanalipod sa iyang kaugalingon batok sa mga mangingilad, tulisan ug mga snatcher nga pilit kaayo og kamot nga manglabni og mga butang gikan sa ubang tawo. (BANAT NEWS)