Gipatay atol sa birtdey sa anak

CEBU, Philippines - Gipusil patay ang usa ka tanod sulod sa pinuy-anan niini samtang nag-asikaso sa birthday party sa iyang anak sa bukirang bahin sa barangay Tubod lungsod sa San Fernando niadtong Domingo sa alas 6:00 sa gabii.

Ang biktima mao si Jose Aranas Manayag, 31, tanod sa nahisgutang lugar samtang wala pa matumbok sa kapolisan ang mamumuno niini apan aduna na silay gidudahang tawo.

Matud ni SPO2 Victor Cuyno sa San Fernando Police dihang nahinabi sa Banat News, ang biktima kauban sa asawa niini ug mga anak nag-preparar sa ilang pagkaon sa panihapon nunot sa pagsaulog sa adlaw’ng natawhan sa usa sa iyang mga anak niadtong higayuna.

Giingong nakuratan nalang sila sa kalit nga pagpaka sa buto sa armas ug nahagba ang biktima nga may samad pinusilan sa ulo ug namatay diha-diha.

Ang kapulisan nagsubay karun sa anggulong gipanimaslan ang biktima human kini mipasaka og kasong pagpanglugos batok sa ig-agaw niini nga milugos sa iyang asawa. - (BANAT NEWS)