Tulisan sa Horseshoe Drive kaigo na sab

CEBU, Philippines - Sa ikatulong higayon ang mga banggiitang tulisan nga anha manganaog sa Horseshoe Drive sa sitio Banawa sa barangay Guadalupe ning dakbayan nakaigo na usab niadtong Domingo sa kaadlawon.

Ang ikatulong nabiktima mao si Mario Seno, 54, drayber sa Limkin Taxi kansang kinitaan nga P1,700 gisakiyo sa upat ka wala mailhing mga pasaherong lalaki.

Ang biktima nga igo nalang nagpa-blotter sa Guadalupe Police Station mibutyag nga misakay ang upat ka mga lalaki sa iyang taksi diha sa dalan P. del Rosario ug nagpahatud sa Horseshoe Drive.

Nakugang nalang siya dihang pag-abot sa nahisgutang dapit kalit siyang giluok sa mga lalaking pasahero diha sa iyang luyo ug ang lalaking tupad niya sa front seat kalit mition og armas kaniya.

Ang biktima gumikan sa kahadlok nga patyon wala nalang mosukol dihang gikuha ang iyang kinitaan. Human niini gikuha usab sa upat ang yawe sa taksi ug gipakanaog siya dayong sibat palayo.

Si Seno igo nalang midangop sa Guadalupe Police Station sa nahitabo. Pasado alas-5 sa kaadlawon dihang gipahibalo sa Pardo Police Station ang giabandonang taksi diha sa usa ka gasolinahan sa barangay Basak ning dakbayan.

Usa ka semana na ang nakalabay, duha ka insidente gihapon sa pagpanulis ang nahitabo sa maong lugar nga pulos taksi ang gibiktima sa duha ka armadong mga lalaki.

Pipila sa mga drayber sa taksi nga gikahinabi sa Banat News apan di buot magpaila nangahadlok na sa ilang seguridad ug ang uban kanila misaway sa kapolisan tungod sa wala pag-aksyon niini. (BANAT NEWS)