Barko naaberya pasahero nagbagulbol

CEBU, Philippines -  Luwas nga naabot sa pantalan ang mga pasaherong unang gibati og kabalaka dihang ang ilahang gisakyang Shuttle Ferry naaberya pagbiyahe nila niadtong Huwebes sa gabii gikan sa dakbayan sa Ormoc.

Si Konsehal Val Ylanan sa dakbayan sa Talisay kinsa usa sa mga pasahero sa barko mibutyag sa Banat News kagahapon nga mibiya ang barko gikan sa pantalan sa Ormoc mga alas 11:00 sa gabii niadtong Huwebes.

Apan usa ka oras lang gikan sa pagbiyahe napawong ang makina sa barko. Matud ni Ylanan nga ang mga tripulante sa barko nagkanayon nga dali rang maayo ang naaberyang makina apan milanat nalang sa kapin sa tulo ka oras wala pa gihapon sila makalarga.

Matud usab sa konsehal nga gibati silang mga pasahero og kabalaka nga maabtan og unos sa lawod ug madisgrasya na hinuon sila.

Ang barko gikatakda untang modunggo mga alas 6:00 sa buntag diha sa Pier 7 apan gumikan sa pagka-aberya alas 9:30 na sa buntag kagahapon kini naabot.

Si Ylanan midugang nga gibana-banang dunay sobra sa 200 ka mga pasahero ang barko niadtong higayona apan luwas hinuon ang tanan.

Base sa report sa TV Patrol Central Visayas, nagbagulbol ang mga pasahero sa barko tungod kay gipanggutom na sila ug wala sila hatagi og pagkaon.

Apan ang kapitan sa barko mipasabot nga walay libreng kaon nga gipanghatag sa barko tungod kay wala sila maabti og alas 12:00 sa udto nga naglutaw sa lawod. - (BANAT NEWS)