P1.8M nga Nubain nasakmit, 4 lakip Australyano gidakop

CEBU, Philippines - Mokabat og P1.8 milyones ang nasakmit nga nubain atol sa buy bust operation sa mga sakop Cebu City Police Office sa (CCPO ug nasikop ang upat ka tawo nga naglakip sa usa ka Australian national ug live-in partner nga usa ka mahuyang nga nanag-iya og botika kagahapon sa udto diha sa giabangan niini nga balay sa dalan Waling-waling sakop sa barangay Capitol Site siyudad sa Sugbu.

Ang nangadakpan mao sila si Randy Torres, 28, taga B. Rodriguez, Roel Garcia, 30, iyang igsuon nga mahuyang nga si Joselito Garcia lumad nga taga Tondo, Manila apan kasamtangan nagpuyo sa maong dapit ug ang live-in partner niini nga si Andrew Jessuf; usa ka Australian.

Ang buy bust operation gipangulohan nila ni Supt. Pablo Labra II, Deputy City Director for Operation sa CCPO ug Chief Insp. George Ylanan, hepe sa Investigation and Detective Management Branch (IDMB).

Si Labra nga nahinabi sa mga tigbalita nagkanayon nga kapin sa usa ka bulan nilang gipanid-an ang pagpamaligya og nubain sa mga suspetsado ug kagahapon sa udto ilang gihimo ang operasyon.

Matud ni Labra si Jessuf maoy naghatag sa ilang gi-order nga 200 ka ampules sa nubain hinungdan nga giapil nila kini pagsikop.

Si Torres nakaangkon og garas sa iyang nawong human misuway og ikyas sa kapulisan bisan kun kini giposasan na. Mikabat og 5,200 ka ampules sa nubain sa 52 ka karton diin ang street value niini nagkantidad og P350 matag usa ang nasakmit.

Si Joselito ug Roel mitug-an sa mga tigbalita nga didto nila gipalit ang nubain sa Tondo sa usa ka ginganlan og Rod Laxamana ug ilang gidala dinhi sa Sugbu.

Matud ni Joselito nga kapin pa sa tuig sila nga nag-operate sa botika sa iyang kapuyo ug duna silay permit sa pagpamaligya og regulated drugs.

Apan iyang giklaro nga namaligya gyud sila og nubain apan sa dihang hingpit na kining nalakip nga usa ka dangerous drugs, wala na sila mamaligya niini hinungdan nga ilaha nalang gitagoan sa ilang giabangan nga balay.

Apan si Sr. Supt. Melvin Ramon Buenafe, hepe sa CCPO nagkanayon nga kinahanglan makapresentar sila og ebidensya nga tinuod nga duna silay permit.

Iyang giklaro nga bisan tuod og duna silay permit apan mapasakaan gihapon nila og kaso ang upat ka suspetsado kay nadakpan sila sa buybust operation. Ang transaksyon nahitabo sa ilang balay ug dili sa botika sumala pa usab ni Ylanan sa report sa Balitang Bisdak kagahapon. (BANAT NEWS)