Charter day malampuson apan kanhi Mayor Osmeña nakasaway

CEBU, Philippines - Malampusong gisaulog kagahapon sa mga empleyado ug opisyales sa kagamhanan sa siyudad sa Sugbo ang ika-74 nga Charter Day nga gibuksan pinaagi sa usa ka Santos nga Misa sa atubangang bahin sa City Hall.

Si Msgr. Roberto Alesna nga maoy miselebrar sa misa mihulagway nga ang kalamboan sa dakbayan sa Sugbu nagagumikan sa nahatag nga serbisyo sa siyudad ngadto sa mga molupyo niini.

Giawhag usab niya ang mga empleyado sa City Hall nga higugmaon ang ilang mga trabaho ug ipatigbabaw gyud kanunay ang tinuoray nga serbisyo publiko.

Usa ka mubo nga programa diha sa hawanan sa buhatan sa Bureau of Fire Protection ang gihimo nga floral offering alang kang anhing Don Vicente Rama, ang giila nga “Father of Charter” sa Sugbo.

Wala motambong sa maong kalihukan si Kongresista Tomas Osmeña kinsa mipadayag nga dili na kinahanglan nga motambong pa siya niini sanglit wala siya mahimuot sa dakong gigasto sa siyudad alang sa selebrasyon sa Charter Day.

Sumala pa sa kongresista nga grabe ra ka dako ang P5 milyones nga gigasto sa siyudad alang sa nahisgutang kalihukan ug mikumparar sa iyang kaniadto pagdumala sa dakbayan nga migasto lang og P300,000 alang sa pagpalit og mga meat roll. (BANATNEWS)