Taga Danao gipusil didto sa Balamban

CEBU, Philippines - Nalandig sa tambalanan ang usa ka ulitawo human kini pusila sa wala hiilhing kriminal didto sa Sityo Sam-ang barangay Cambuhawe lungsod sa Balamban sa miaging gabii.

Ang biktima mao si Conrado Suico, 21 anyos, ulitawo, lumad nga taga siyudad sa Danao ug temporaryong mibakasyon sa iyang mga paryente sa maong lugar.

Si PO3 Julius Obanana sa Balamban Police mibutyag sa Banat News nga ang biktima naglakaw sa dalan paingon sa iyang gipuy-ang paryente dihang gipusil sa wala hiilhing kriminal ug nasabak sa usa ka bala ang iyang tuong bat-ang.

Maayo nalang kay may nahiaging tawo nga maoy midala kaniya ngadto sa Balamban District Hospital apan gibalhin siya sa tambalanan sa dakbayan sa Sugbo.

Padayon pang gipangita sa kapolisan ang kriminal uban sa ilang pagduda nga paregla ang hinungdan o kaha may labot sa magkaribal nga grupo sa fraternity sa maong lugar ang maong pagpamusil. - BANAT NEWS