italiano gidunggab sa dalagitang hinigugma

CEBU, Philippines - Nalandig sa tambalanan ang usa ka langyaw human gidunggab sa iyang hinigugmang babaye nga usa ka menor de edad sa ilang giabangan nga apartment kagahapon sa alas-2 sa kaadlawon diha sa Windland Tower nga nahimutang sa barangay Camputhaw siyudad sa Sugbu.

Si Roberto Robertile, 59, usa ka Italian ug kasamtangan nagpuyo sa maong apartment anaa karun sa Chung Hua Hospital human nakaangkon og daghang samad dinunggaban sa kalawasan lakip na sa iyang ulo.

Hinuon nadakpan sa gwardya sa maong tower ang 17- anyos nga si Ana (tinuod nga pangan gipugngan sa Banat News) nga taga Villagonzalo Uno.

Sa report sa Buena Mano Balita sa GMA-7 kagahapon sa buntag ang 17- anyos mitug-an nga nasuko ang iyang uyab nga iyang gibalibarang makighilawas sanglit mihangyo kini sa wala pa mahitabo ang pagpanunggab.

Sa laing interbyu si Ana mitug-an nga sa nanghugas siya sa plato niadtong higayona sa dihang iyang nakit-an sa salamin diha sa lababo nga nagbitbit og martilyo ang biktima nga paingon na unta kaniya.

Nagtuo si Ana nga bukbokon siya sa martilyo sa langyaw hinungdan nga iyahang giilog ang martilyo ug nakakita siya og kutsilyo kilid sa lababo ug maoy iyang gigamit pagdunggab ngadto sa iyang hinigugma.

Ang biktima nga nagpunay og sagang sa mga atake sa menor edad nasamad ang iyang mga kamot ug bukton.   

Si PO2 Michael Codaste, imbestigador sa Homicide Section sa Cebu City Police Office (CCPO) nga nahinabi sa Banat News mitug-an nga bisan kun samaran ang langyaw nakahigayon pa kini’g gawas sa giabangang kwarto sa room 2003 ug misakay sa elevator paingon sa ubos ug daling nangayo’g tabang sa gwardya.

Si Ana nga minaog usab sa ubos nakit-an ni Joel Buntoyan, gwardya sa maong apartment ug misikop kaniya ug gi-turnover ngadto sa mirespondeng kapulisan sa Fuente Police Station.

Si Ana mitug-an nga usa pa sila ka semana nagkauyab sa langyaw pinaagi sa text ug niadtong miaging semana gipapuyo siya niini sa maong apartment. - (THE FREEMAN)