Daghang mitampo para ganti sa impormante

CEBU, Philippines - Gilauman sa mga opisyal sa lungsod sa Minglanilla nga molapas pa ngadto sa P100 mil ang matigom nilang salapi alang sa ganti sa makatudlo sa mga suspetsadong midagit ug mipatay sa 6-anyos nga batang si Ellah Joy Pique.

Si Konsehal Concordio Mejias sa lungsod sa Minglanilla nga nahinabi sa Banat News mibutyag nga nagpahigayon sila og special session kagahapon sa buntag diin naaprubahan nga magtampo-tampo aron makatigom og P100 mil aron maoy ganti sa makatudlo sa mga midagit ug mipatay sa bata.

Matud ni Mejias nga miluwat sila og resolusyon nga naghatag og pagtugot sa disbursing officer sa lungsod nga awtomatikong pahatan ang ilang mga honorarium alang sa nahisgutang katuyoan.

Matag usa ka konsehal ubos sa P10 mil ang ilang matampo tungod kay dunay mga negosyante sa lungsod ang boluntaryong mihatag og amot.

Gilauman nga molapas sa P100 mil ang matigom nilang kwarta ug ang sobra niini ihatag nila ngadto sa pamilya sa biktima isip hinabang.

Gawas sa paghatag og tampo si Mayor Eduardo Selma misaad usab kining mohatag og pinansiyal nga tabang ngadto sa pamilya ni Ellah Joy.

Si Mejias mipasabot nga wala na sila mogamit sa kwarta sa lungsod tungod kay daghan pang agian nga proseso ug buot nilang madali ang ilang tumong nga makatigom og P100 mil.

Si Ellah Joy gidagit niadtong Martes sa hapon pipila ka metros gikan sa iyang tunghaan sa Calajo-an Elementary School sa lungsod sa Minglanilla ug patay nang napalgan sa Guimbuwangan lungsod sa Barili pagkasunod adlaw.

Atol sa sesyon nga gipangulohan ni Bise Mayor Elanito Peña, ang hepe sa kapulisan nga si Chief Insp. Laurel Almirante mibutyag nga kuwang gyud ang iyang 22 ka mga polis pagbantay sa lungsod.

Samtang giawhag sa Konseho ang National Bureau of Investigation (NBI-7) nga tabangan ang imbestigasyon ug miawhag usab sa mga opisyales sa barangay ug mga prinsipal sa mga tunghaan nga mokooperar sa kapolisan alang sa seguridad.

Sa laing bahin, ang lalawigan sa Sugbu mihatag na og food assistance sa pamilyang

Pique ug giingong dugangan pa kini og cash assistance. (BANAT NEWS)