CEBU, Philippines - Patay ang usa ka dalaga ug kritikal ang kahimtang sa drayber sa iyang gisakyan nga motorsiklo human kini makaligis og bato ug misaliring sa karsada sa highway sa barangay Cayam, lungsod sa Naga kagahapon sa alas 3:30 sa kaadlawon.
Ang namatay mao si Marie Joy Quirante De Gracia, 32, molupyo sa North Poblacion, samtang ang drayber sa motorsiklo nga anaa usab sa kritikal nga kahimtang mao si Rabone Dela Corte, hingkod, minyo, nga taga Upper, Colon Naga.
Si PO2 Ken Cabrera, desk officer sa Naga Police Station mibutyag sa Banat News nga ang mga biktima paingon unta sa lungsod sa Minglanilla apan pag-abot sa maong lugar aksidente kining nakaligis og bato taliwala sa karsada.
Busa mibaliwliw ang motorsiklo ug misaliring kini dayong kalagpot sa mga biktima ug mitugpa kini sa sementadong karsada nga nabundak ang ulo nga maoy hinungdan sa hinanaling kamatayon ni de Gracia ug katalandugon sa kahimtang ni dela Corte.
Didto ideklara ang biktima nga dead on arrival sa South General Hospital samtang gi-atiman usab sa mga doktor si dela Corte. (BANATNEWS)