Director sa BFD mikurtesiya sa gobernador

CEBU, Philippines - Ang bag-ong regional director sa Bureau of Fire Protection (BFP) mihimo og kurtesiya kang Gobernador Gwendolyn Garcia bag-ohay pa lamang.

 Sa iyang pagsaludo sa gobernador, si Sr Supt. Maria Luisa Hadjula nagkanayon nga iyang gikalipay ang pakighimamat sa gobernador sa pagpaila nga siya na ang bag- ong director sa BFP dinhi sa rehiyon 7. Iyang gidayeg ang gobernador kay bisan hagip-ot kaayo ang schedule niini apan migahin gayud og higayon aron makigkita sa bag-ong director sa bombero

 Kauban ni Hadjula sa pagpakigkita sa gobernador mao sila si Supt. Victor Vibares ang provincial fire marshal sa Cebu, Insp. Josie Lising sa Head Executive Assistant sa BFP 7 ug uban pang mga opisyal.

 Gitataw ni Hadjula nga isip bag-ong hepe sa kabomberohan dinhi sa rehiyon, iyang ipatuman ang mga programa sa BFP pinaagi sa pagpadayon sa nasugdan na nga mga proyekto sa iyang gipulihang opisyal sa rehiyon ug andam siya sa pakigtambayayong sa buhatan ni Gobernador Garcia.

 Nunot niini ang gobernador nagkanayon nga kun unsa man ang iyang nahatag nga suporta sa miaging Regional Director sa BFP, iya usab kining ipadayon paghatag sa bag-ong director. Sa nasayran nga ang probinsiya sa Sugbo nakahatag na usab og mga firetruck ngadto sa mga kalungsoran sa lalawigan sa Sugbo. (BANAT NEWS)