LGU giawhag mangandam kanunay

CEBU, Philippines -  Giawhag ang mga lokal nga kagamhanan dinhi sa Sugbo sa paghimo og mga pangandam sa mahitabong katalagman sa ilang mga lugar nga mugna sa nagpadayong pagdaut sa panahon.

Si Estrelieta Escanan nga maoy Provincial Disaster and Risk Reduction Management Council (PDRMC) nga nahinabi sa Banat News miingon nga ang maong pahimangno sa ilang buhatan daan na nilang gihimo sa miagi pang bulan tungod sa La Niña nga moigo dinhi sa nasud.

Gitataw ni Escanan nga dinhi sa Sugbo ang mga lokal nga kagamhanan nakahimo na daan og pangandam sa bisan unsang katalagman nga mahitabo dinhi.

Matud pa ni Escanan nga niining panahon sa kanunay nga pag-ulan maoy sagad nga mahitabong katalagman ang pagbaha o pagdahili sa yuta ug ang mga mayor sa kalungsoran ug mga dakbayan mihimo nang daan sa ilang pangandam.

Si Escanan miingon nga naglakip sa ilang pangandam, mao ang paghiklin sa mga molupyo nga nahimutang sa lugar nga dahilianan og yuta    o pagkabanlas sa baha.

Gianinaw na daan ang lugar nga mahimo nilang temporaryong kapuy-an nga mahimutang sa luwas nga lugar sa tinguha nga kalikayan ang dautang panghitabo niini.

Gipadayon niya nga ang ilang buhatan sa Office of the Civil Defense (OCD) bukas sulod sa 24 oras sa tuyo nga dali nga makatubag sa mga alarma sa katalagman nga mahitabo dinhi sa Sugbo.

Si Board Member Thadeo Ouano sa ikaunom nga distrito sa lalawigan sa Sugbo nga maoy chairman sa committee on environment mipalabang usab og resolution nga nag-awhag sa buhatan sa Mines and Geosciences Bureau (GMB) 7 sa paghatag og kasayuran sa mga mayor ug barangay kapitan sa survey nga gihimo nga maoy nagtug-an sa kuyaw sa pagdahili sa yuta ug mga pagbaha. (BANAT NEWS)