Tulisan nasikop sa nagpatrolyang polis

CEBU, Philippines -   Usa ka suspetsadong tulisan nasikop sa nagpatrolyang kapolisan sa dakbayan sa Talisay kagahapon sa kadlawon.

Ang nasikop mao si Junald Bajura, alyas “Witnes”, 18, nga taga sitio Balikog Kahoy, barangay Pakigne, Lungsod sa Minglanilla.

Nasakmit nila ni PO3 Ferdinand Pablo ug PO2 Henry Mata gikan kang Bajura ang usa ka kutsilyo nga adunay gitas-ong walo ka pulgada.

Gawas kang Bajura nasikop usab si Gaylo Delagente, 27, nga taga barangay Pakigne, Minglanilla tungod sa pagluklok usab niini og usa ka kutsilyo nga may gitas-ong napulo ka pulgada.

Sa wala pa masikop si Bajura ug Delagente, si Anabel Taborada, 33, taga barangay Tunghaan, Minglanilla mi-report sa Talisay City Police Station human siya tulisa sa lima ka mga lalaki sa tulay sa Mananga sa barangay Tabunok mga alas 11:45 sa gabii niadtong Lunes.

Nakuha sa mga tulisan gikan kang Taborada ang iyahang shoulder bag nga dunay sulod nga P1,500 nga kwarta, payong, GSIS ID, PRC ID ug cellphone headset.

Human masayri ang maong hitabo milihok dayon ang kapolisan ug nagpatrolya sa maong lugar uban ni PO3 Pablo ug Mata diin nasikop nila si Bajura ug Delagente ug gidala nila kini sa ilang buhatan diin nagpaabot didto   ang biktima nga si Taborada.

Si Bajura positibo kaayong giila ni Taborada nga usa sa mitulis kaniya uban sa mga kauban niini nga giila lang nga sila si “Robert”, “Buddy”, Melvin ug Reymart Roxas.

Kahinumdoman nga si Roxas maoy usa sa giingong kauban ni Rolando Sanchez kinsa napusilan atol sa pagpanulis nila sa mga pasahero sa  jeep pasaheroan diha sa Mananga sa milabay’ng semana.

Si Roxas kinsa hangtod karon wala masakpi nakasibat kini sa gipahigayong follow-up operation sa kapolisan niadtong milabay’ng semana.

Apan hinuon una siya pasakai og kasong robbery ug frustrated homicide, apan karon nag-atubang na usab kini og laing kasong robbery ug concealing of deadly weapon samtang si Delagente concealing of deadly weapon ra ang atubangon niining kaso. (BANAT NEWS)