CEBU, Philippines - Patay ang usa ka babaye nga gipusil sa duha ka wala hiilhing mga batan-ong tulisan nga kauban niining pasahero sa traysikol sa dalan S. Osmeña sa barangay Gun-ob, dakbayan sa Lapulapu alas- 9 pasado ang takna kagahapon sa buntag.
Ang namatay mao si Maria Luisa Galapin, 54, asawa sa usa ka engineer nga kasamtangan nga nagtrabaho sa nasud sa Africa. Si SPO4 Gaspar Magdadaro nga maoy desk officer sa Lapulapu City Police Office (LLCPO) nga nahinabi sa Banat News miingon nga gikan sa sitio Mahayahay, barangay Bankal sa maong dakbayan ang biktima nga nagsakay sa traysikol.
Matud pa ni Magdadaro nga sa paghidangat sa unahan nga bahin sa barangay Bankal ang duha ka batan-ong lalaki misakay usab sa traysikol nga giluwanan sa biktima ug ang usa mitupad sa paglingkod sa sulod sa side car ug mi-backride usab sa drayber ang lain niining kauban.
Sa paghidangat sa nahitaboan kalit nga mibunot og pusil ang duha ka mga kaubang pasahero sa biktima ug gipangtiunan ang biktima ug ang wala pa mailhi sa kapolisan nga drayber sa maong traysikol dayong deklarar og tulis.
Sumala pa nga nagdumili ang biktima sa paghatag sa iyang shoulder bag hinungdan sa nahitabong linayogay nila diha sa sulod. Nagtuo ang kapolisan nga adunay dakong salapi ug mga alahas si Galapin maong misukol kini.
Tungod sa kapungot sa tulisan gipusil niini ang nawong sa biktima hinungdan sa pagkamatay niini.
Human sa maong pagpusil ang mga tulisan dali usab nga nanagan pahilayo sa maong lugar. Atol sa ilang pag-ikyas diriyot madakpi ang usa sa mga tulisan human niini gikasugat ang usa sa mga tulisan apan milugnot ug nakaikyas.
Si Magdadaro miingon nga gidala ang biktima sa Mactan Doctors Hospital sa barangay Basak apan ang mga doktor nga nag-atiman sa maong tambalanan ang mideklarar niini nga dead on arrival.
Si Magdadaro nga padayon pa karon ang ilang hot pursuit operation batok sa mga tulisan ug pag-ila sa ilang mga pangalan. (BANAT NEWS)