CEBU, Philippines - Nasikop sa kapolisan ang usa ka tulisan kinsa mitulis sa usa ka lalaki nga nagpaabot og sakyanan sa kilid sa Cebu Technological University (CTU) sa dalan M J Cuenco Avenue, ning dakbayan sa Sugbo sa miaging gabii.
Ang nadakpan ug mikagulkol na karon sa prisohan mao si Mark Joseph Manabilang Escarpe, 30, lumad nga taga Rosevelt, Purok 9, dakbayan sa Iligan, apan naa manimuyo sa dakbayan sa Sugbo isip dispatser.
Ang iyang gibiktima nailhan nga si Ramonato Bacalso Lastimosa, 40, nga taga Kaimito, barangay Pusok, dakbayan sa Lapulapu.
Sumala sa kapolisan nga nagpaabot og sakyanan ang biktima sa kilid sa CTU dihang kalit kining giduol sa suspetsado ug dayon gitionan og armas de fuego uban sa pagdeklarar og tulis.
Unya ang biktima gihimulbolan sa iyang relo de pulso ug antiyohos, dayon gipasidan-an nga dili pareklamohon aron dili mapusilan.
Apan nataymingan nga maoy paglabay ni SPO1 Renie Sultan sa Cebu City Police Office sa maong dapit ug gipahibawo dayon sa biktima bahin sa nahitabo kaniya.
Ang suspetsado nga wala pa makalayo sa maong lugar dali kaayong nasignit ni Sultan ug gibalhog dayon kini sa prisohan sa Waterfront Police Station.
Nasayran nga ang suspetsado usa ka dispatser sa Plaza Independencia ug daghan na kuno kining natulis sa maong lugar. (BANAT NEWS)