CEBU, Philippines - Nagtibi ang usa ka lalaki nga misumbong sa kapolisan sa dakbayan sa Talisay human kawata ang iyang motorsiklo didto sa Camella Homes, barangay Lawaan I, dakbayan sa Talisay kagahapon sa buntag.
Ang biktima mao si Virgenio Dalucanog, 32, taga sitio San Miguel, barangay Linao, sa maong dakbayan.
Sa imbestigasyon sa kapolisan nasayran nga giparking ni Dalucanog ang iyang Honda Wave 100 nga motorsiklo kolor puwa nga adunay sagol nga itom nga nagtangag sa plakang OV-8655 sa ubos nga bahin sa ilang gipuy-an nga sakop na sa Camella Homes.
Apan pagbalik ni Dalucanog sa maong dapit wala na ang iyang sakyanan.
Sa laing bahin, usa ka 42-anyos nga babaye gitulis sa upat ka mga batan-ong lalaki didto sa barangay Tabunok, dakbayan sa Talisay kagahapon sa kaadlawon.
Ang biktima mao si Elizabeth Maraton, taga barangay Pardo, dakbayan sa Sugbo.
Usa sa nahisgutang mga tulisan giilang si Kent Cañedo kinsa suspetsado kaniadto sa pagpusil patay sa usa ka kahera sa imnanan sa sitio Nonoc, barangay Tabunok.
Nadala sa mga tulisan ang upat ka cell phone ni Maraton nga nagkantidad tanan og P10,000, kwarta nga P1,300 ug duha ka bag nga dunay sulod nga mga panapton.
Si Maraton nagsakay og PUJ gikan sa Pardo ug pag-abot duol sa lugar nga nahitaboan misakay usab ang upat ka mga tulisan kinsa nagpatuo nga mga pasahero apan kalit lang milanit sa ilang mga armas de fuego ug dayon mideklarar nga tulis.
Gipangita pa sa kapolisan ang maong mga tulisan. (BANAT NEWS)