Nubain hingpit nang illegal drug lapas sa Enero 28 - Oaminal

CEBU, Philippines - Gipahibawo ni kanhi Dangerous Drugs Board DDB Undersecretary Paul Clarence Oaminal nga human ipublikar sa pamantalaan niadtong Enero 13 nga ang Nubain usa na ka ginadiling druga, karong umaabot nga Enero 28, 2011 higpit na ang epekto ning maong balaod diin kutob sa adis-adis nga mogamit niini prisohon sa tibuok niyang kinabuhi.

Kini tungod kay naklasipikar na ang Nubain nga kabahin gyud sa ginadiling drugas , sumala pa ni Oaminal.

Gipasabot ni Oaminal nga iniglapas na sa Enero 28 , tanang madakpan nga mogamit og Nubain pahamtangan na og silot nga sama niadtong tiggamit og shabu   ug uban pang ginadiling drugas nga mao ang pagkabilanggo sa tibuok kinabuhi.

Matud ni Oaminal nga kini mas bug-at kun itandi sa ordinansa sa dakbayan sa Sugbo nga nagpahamtang lang og silot nga pagkabilanggo sulod sa usa ka tuig ug pagpahamtang og P5 mil nga multa sa madakpang mag-Nubain.

Nunot niini gihagit ni Oaminal ang mga tigpatuman sa balaod ingon man ang mga prosecutor sa higpit nga pagpatuman niining maong balaod aron kaminus-minusan o kaha masumpo sa hingpit ang pagpakabuang karon sa mga batan-on sa Nubain. Nasayran nga gumikan sa kamahal sa shabu, Nubain na ang gigamit sa mga adis-adis aron matagbaw ang kauhaw sa ilang ginhawaan sa drugas.

Matud ni Oaminal nga siya ug si Senador Vicente Sotto III nga kanhi DDB chairman maoy mipasabot ug mikombinser kaniadto sa DDB board nga ideklarar nga dangerous drug ang   Nubain. Gani particular nga gihimong basehanan ni Oaminal ang barangay Kamagayan dinhi sa dakbayan sa Sugbo nga maoy gitumbok nga usa sa mga lugar diin mikatap pag-ayo ang paggamit og nubain. - BANAT NEWS