Polis 'nagmaoy' namosas og mga tawo

CEBU, Philippines - Usa ka pulis nga gipasanginlang hubog ug nagmaoy ug nanion sa iyang armas sa tulo ka mga trabahante sa farm ug dili pa igo gipangposasan ang duha sa tulo ka trabahante sa miaging alas 6 pasado sa gabii diha sa barangay Tubigan sa lungsod sa Compostela.

Ang gipasanginlan mao si PO3 Oliver Rondina, nagpuyo sa barangay Estaca sa lungsod sa Compostela ug nadestino ra sab diha sa naasoy’ng lungsod.

Si Sr. Supt. Erson Digal, hepe sa kapulisan sa probinsya miila sa mga reklamante nga sila si Gerardo Malabon, 39, taga sitio Guila-Guila sa barangay Bagalnga, Marcos Baco, 49, taga Tubigan, ug Junrey Jayme Arenas, 31, taga Tubigan ug trabahante sa Sunrise Gamefarm.

Si Digal mitug-an nga nakadawat siya og impormasyon gikan sa hepe sa kapulisan sa Compostela kabahin sa gibuhat ni Rondina maong gimando niyang dad-on dayon si Rondina sa Provincial Headquarters.

Kini aron malikay sa laing kagubot ang maong polis sanglit giingong nagkadaghan ang mga tawo sa police station nga nangita ug nasuko og maayo sa maong polis.

Matud pa ni Digal nga kagahapon sa buntag ang tag-iya sa Sunrise Gamefarm mibisita sa iyang buhatan ug mitug-an nga nag- firing sila sa maong pulis unya pagkahuman nag-inom-inom uban sa iyang mga trabahante.

Apan niana nang pagkagabii giingong kalit lang nanion si Rondina og armas sa mga trabahante ug sila si Malabon ug Baco gipangposasan.

Matud ni Digal nga gidala nalang sa police station sila si Malabon ug Baco kay ang yawe sa posas niini nawagtang.

Si Rondina mipa-blotter usab nga giimbitar siya sa tag-iya nga si Ricky Bitoon ug nag-inom ug ang duha nananghid nga mopasalba sa ilang armas.

Apan tungod kay walay lisensya ang maong mga armas iyaha silang gibadlong apan giingong gikasuko kini sa duha ug diha-diha gialirungan siya sa uban pang mga kawani sa farm maong mibunot siya sa iyang armas ug miambak sa kural hinungdan nga siya naligid ug nawagtang ang iyang armas.

Tungod sa maong hitabo si Rondina girelibohan dayon kagahapon ug gidestino sa Provincial Security Service Group (PSSG) samtang nag-atubang og imbestigasyon.

Si Rondina sa dihang gikuhaan og reaksyon sa mga tigbalita diha sa CPPO nagdumili pagtubag ug igo lang miingon nga ‘no comment ko ana.  - BANAT NEWS