CEBU, Philippines - Patay na nga midangat sa tambalanan ang usa ka 6-anyos nga batang lalaki human kini giingong natumba sulod sa compound sa iyang tunghaan sa North Central Elementary School sa barangay North Poblacion, lungsod sa San Fernando kagahapon sa buntag.
Ang nakabsan sa kinabuhi mao si Kenke Labong, taga barangay South Poblacion sa nahisgutang lungsod, tinun-an sa grade one, matud ni PO1 Lauro Laurel sa San Fernando Police Station .
Ang biktima giingong nakuyapan human kini matumba sa yuta sa wala hisayring hinungdan.
Si Labong daling gidala sa iyang adviser nga si Mrs. Helen Grace Siarot sakay sa usa ka ambulansiya ngadto sa South General Hospital sa lungsod sa Naga apan wala na makaabot nga buhi sa maong tambalanan ang nahisgutang bata. Sa oras sa pagsuwat niining balita matud ni Laurel nga nagpahigayon pa sila og follow-up nga imbestigasyon sa maong hitabo pagpiho sa hinungdan sa kamatayon sa bata. (BANAT NEWS)