Gwen mosuporta'g kandidato sa PCL

CEBU, Philippines - Si Gobernador Gwendolyn mibutyag nga may suportahan siyang   kandidato sa pagka-national president sa Philippine Councilors’ League (PCL).

Kini human mangayo og suporta kaniya si Councilor Maricel Morales sa Angeles City sa National Movement of Young Legislators (NMYL) niadtong miaging adlaw.

Si Morales gikuyogan sa iyang mga kauban sa iyang team usa na niini ang artista nga si Terry Onor, sa pagpakigkita niya kang Garcia.

Matud pa sa gobernador nga iyang gi-endorsar si Morales agi og pagtuman sa iyang baruganan nga kanunay nga makigkaalyado sa mga opisyales sa gobiyerno alang sa dakong tinguha sa kalambuan ug kauswagan sa nasud.

Gawas niini, suportahan usab sa gobernador ang mikandidato sa pagka-bise presidente ni Morales nga si provincial board member Carmen Remedios Ivy Durano Meca, kinsa maoy presidente sa PCL dinhi sa lalawigan sa Sugbo.

Samtang si Morales mitumbok nga ang gihatag nga suporta ni Garcia dako na kaayo og ikatabang sa iyang kandidatora sa pagka national president sa PCL sanglit daghan man og kaila ug kaalyado ang gobernador dinhi sa lalawigan ug sa ubang mga probinsiya. - BANAT NEWS