Piniriso sa TCJ mag-Sinulog

CEBU, Philippines - Dili pa kaayo daghan ang mga barko ug motorbanca nga miparehistro aron mosalmot sa fluvial procession sa Sabado, ang bisperas sa Sinulog Mardigras.

Si Cebu Coast Guard Commander Rolando Punzalan mibutyag sa Banat News nga kutob kagahapon sa udto mikabat pa lang og 45 ka mga gagmay ug dagko nga barko ang nakaparehistro sa ilang buhatan.

Kini mas menus kun itandi sa milabay’ng tuig diin mikapin sa 200 ka mga gagmay ug dagko nga barko ang misalmot sa maong kalihokan lakip na ang mga sea marshal.

Hinuon nagtuo si Punzalan nga mohugop ang daghang mga moparehistro karong buntag tungod kay karong adlawa nalang ang deadline sa ilang pagpanawat sa buot mosalmot sa fluvial parade.

Gipasabot ni Punzalan nga dili gyud nila tugotan nga maka-apil sa fluvial kadtong mga barko nga wala marehistro aron paglikay sa disgrasya tungod kay tuyo nila nga una irehistro ang sakyanan nga mosalmot sa maong procession, masusi ang katakus niini padaganon sa kadagatan ug sa pagklaro kun lisensyado ba ang kapitan.

Nunot niini hingpit na nga naplantsa ang tanang plano sa Cebu Coast Guard ug ubang mga hingtungdang ahensiya ang pagpatuman sa higpit nga siguridad atol sa fluvial procession atol sa gipahigayung final meeting kagahapon.

Ang maong tigom nga gipatawag ni Punzalan gitambongan sa mga representante gikan sa Philippine Navy, Cebu Port Authority (CPA), Maritime Industry Authority (MARINA) ug customs police nga gitahasan sa pagpatunhay sa kahusay ug kalinaw sa procession. Gitutokan niini ang pag-umol og task force nga maoy moatiman niadtong mga tawo nga mosalmot sa fluvial procession nga magkinahanglan og tabang kun makasugat og kakuli-an sa kadagatan.

Higpit usab nga ipatuman ang no over-loading, no firecracker ug ingon man no liquor samtang magsakay sa mga barko ug motorbanca nga musalmot sa procession aron paglikay sa posibleng mga kakulian ug disgrasya. - BANAT NEWS