CEBU, Philippines - Gipahimagnoan ni Mayor Michael Rama ang tanang mosalmot sa Sinulog Grand Parade karong Enero 16 nga dili mangitsa og mga “giveaways” ngadto sa mga tawo aron dili mabalda ang parada.
“Kung mahimo dili na lang ta mangitsa, kay peligro kaayo og magubot usab ang mga tawo,” nagkanayon si Rama dugang sa pagpasabot nga dili niya buot may mahitabong stampede tungod lang niini.
Gusto ni Rama nga dili mahitabo pagbalik ang mga reklamo sa milabay nga mga Sinulog nga dunay ubang tawo ang madasmagan gumikan kay mag-inilogay sa mga t-shirts ug uban pang mga butang nga ipang-itsa sa mga misalmot sa parada partikular na ang float category.
Sa laing bahin, sugdan na karong hapon ang rehistrasyon sa mga tawo nga buot mopuyo sa Devotee City nga nahimutang kilid sa karaang Compaña Maritima Building.
Kini maoy himuong temporaryong kapuy-an sa mga debotos ni Señor Sto. Niño gikan sa nagkalainlaing dapit sa probinsya nga mamista sa siyudad apan wala’y kaabtan dinhi sa siyudad.
Nagkanayon si Konsehal Roberto Cabarrubias nga mao usab ang chairman sa Devotee City nga buksan ang maong area ugma sa buntag.
Ang mga debotos ni Sr. Sto. Niño nga gustong mopahimos sa maong programa gikinahanglan nga makapresentar og mga dokumento sama sa ticket sa bus aron makaparehistro sa Devotee City nga maka-okupar og 3,000 ka mga tawo.
Gipahimagnoan usab ni Cabarrubias ang mga debotos nga kinahanglan nga motuman sa mga palisiya sulod sa Devotee City ug usa niini ang pagdili sa pag-inom og ilimnong makahubog.
Dili puwede manigarilyo ug kinahanglan nga sul-ubon kanunay ang ilang ID. Samtang ang Cebu City Health Department, sila usab ang mo-monitor sa kahimtang sa panglawas ug giandam na usab nila ang mga tambal sa higayon nga dunay masakit nga mga debotos. - BANAT NEWS