12,000 ka tropa ang mobantay atol sa Sinulog Parade

CEBU, Philippines - Kapin sa 12 mil ka polis, sundawo ug volunteers ang i-deploy karung Domingo atol sa Sinulog Grand Parade sumala pa ni Police Regional Office-7 director, Chief Supt. Ager Ontog Jr. kagahapon human sa gipatawag niya nga   final briefing uban sa kadagkuan sa Central Command. Si Ontog mitataw nga kinahanglan magtinabangay ang tanang law enforcement agencies lakip na ang komunidad nga magmalinawon ang maong selebrasyon.

Si Ontog gidayeg hinuon niya ang preparasyon ug plano nga gihimo ni Sr. Supt. Melvin Ramon Buenafe ang hepe sa kapulisan sa dakbayan sa Sugbu kinsa maoy Task Force Commander sa Sinulog Grand Parade.

Matud pa niya nga mokabat sa 800 ka sakop sa Regional Public Safety Battalion ug sa Regional Training School ang iyang idugang nga puwersa sa kapulisan sa dakbayan ug mokabat usab sa 9 mil ka mga sakop sa Reserve Officers Training Corps ug Army Reservists gikan sa Central Command ang ipakatap.

Iya gibahin sa walo ka sector ang security forces nga pangulohan og mga opisyal aron mabantayan ang mga tawo.

Usa sa ilang gihatagan og pagtagad ang pagpangabot na dinhi sa siyudad sa mga kiriwan og kamot gikan sa Davao, Cagayan de Oro, Ormoc City ug kaulohan nga tumong ug tuyo nila mao ang pagpanguot ug uban pa. Si Lt. Col. Raymundo Bañares, pangulo sa 7th Regional Community Defense Group sa Central Command nagkanayon nga karung Sabado atol sa Solemn Procession iyahang ipakatap ang gatosan ka mga ROTC cadets diha sa dalan Manalili ug D. Jakosalem.

Si Sr. Supt. Buenafe nga nahinabi sa mga tigbalita miingon nga estrikto nilang ipatuman ang pag-inom inom diha sa kadalanan duol sa parade route ilabi na diha sa Fuente Osmeña Rotunda.

Gipatawag usab nila kagahapon ang mga pangulo sa duha ka fraternity nga mao ang Tau Gamma Phi ug Alpha Kappa Rho aron mapahimangnoan ang ilang mga sakop tungod sa karaang panagbangi sa ilang mga sakop nga basin moulbo atol sa parade. - BANAT NEWS