Drayber sa habal-habal gipusil sa ulo patay
CEBU, Philippines - Patay ang usa ka 19-anyos nga drayber sa habal-habal human kini pusila sa wala mailhing kriminal samtang ang biktima nagbiyahe sakay sa iyang motorsiklo kagahapon sa kadlawon diha sa Santa Maria Heights Subdivision, barangay Maghaway, dakbayan sa Talisay.
Ang biktima giila sa mga polis nga si RJ Cabigas Elegen, taga barangay Tapul sa nahisgutang siyudad.
Si Elegen nakaangkon og usa ka samad pinusilan sa tuong bahin sa iyang ulo wala na makaabot nga buhi ngadto sa Talisay City District Hospital.
Si Inspector Hugo Rio Ipong nga nahinabi sa Banat News kagahapon nagkanayon nga nagpahigayon pa og follow-up nga imbestigasyon sila si PO1 Jundave David ug PO2 Henry Mata kabahin sa hitabo.
Matud ni Ipong nga duha sa gisubay nilang anggulo sa maong pagpatay mao ang paregla ug personal nga bangi. - BANAT NEWS
- Latest
- Trending
