CEBU, Philippines - Patay ang usa ka magtutudlo sa high school samtang naangol usab ang bana niining drayber sa motorsiklo human ang ilang sakyanan aksidenteng nalamba sa kurbadahong karsada didto sa national highway sa barangay Binabag lungsod sa Bogo niadtong Lunes sa alas 6:00 sa gabii.
Ang patay nang nadangat sa tambalanan mao si Fediles Ruiz Alelin, 26, minyo, nga taga barangay Goyong ,lungsod sa Borbon ug magtutudlo sa high school sa lungsod sa Daanbantayan.
Samtang ang bana niining maoy nagmaneho sa motorsiklo nga ilang gisakyan mao si Jake Lobitana Alelin, 27 anyos.
Si SPO2 Rogel Layson sa Bogo Police Station mibutyag sa Banat News nga ang mga biktima gikan sa lungsod sa Daanbantayan human sa klase ug paingon na untang mopauli sa ilang pinuy-anan sa Borbon.
Apan pag-abot sa maong lugar sa kurbadahong bahin sa may Hacienda Felomina naligas ang ligid sa ilang sakyanan sa daplin sa karsada hinungdan sa ilang pagkalamba.
Ang biktima nga si Fediles nga wa magsul-ob og helmet niadtong tungora maayong pagkabunal sa ulo sa sementadong karsada nga maoy hinungdan sa iyang kamatayon.
Samtang ang iyang bana nga nagsul-ob og helmet igo lang nakaangkon og gamay’ng pangos sa kalawasan ug bukton.
Gisuwayan unta paghatod ang biktima ngadto sa Verallo District Hospital apan gideklarar kining dead on arrival tungod sa seryusong kadaut nga naangkon sa ulo niini nga napantok sa sementong karsada. (BANAT NEWS)