Pag-ampo di palihi

CEBU, Philippines - Pag-ampo ug dili palihi ang gitambag sa Simbahan ngadto sa mga katoliko karon nga miabot na usab ang laing hagit sa Bag-ong Tuig.

Imbes nga mangolekta og mga linginon nga prutas, feng shui ug uban pang palihi nga pampaswerte, mas nakita sa simbahan ang pag-ampo ug kakugi nga maoy labing epektibong paagi aron magmalambuon ang tawo.

“Kita dinhi sa Simbahan dili jud motuo ana, naa ra nato ang paningkamot kun moasenso ta ug dili sa mga palihi,” matud pa ni Msgr. Roberto Alesna ang kura paroko sa Cebu Metropolitan Cathedral.

Hinuon, girespeto ni Alesna ang maong palihi tungod kay dugay na kini nga tradisyon ug kultura sa mga Filipino ug nahimo na kini nga kabahin sa atong pagsaulog sa Bag-ong Tuig. Sa laing bahin, mihatag usab sa ilang mensahe ang tibuok Archdiocese sa Sugbu ngadto sa pagsaulog nato sa Bag-ong Tuig, diin ilang tema “Just as this year 2010 where gifts of love and peace, we also look for a new year 2011 to be more harmonious and fruitful,” dugang pa ni Alesna.

Gawas sa bag-ong tuig, karong adlawa usab gisaulog sa simbahan ang kapistahan sa “Motherhood of Mary”, nga naandan na nga isaulog sa unang adlaw sa Bag-ong Tuig. (BANAT)