CEBU, Philippines - Ang pagpananom og mga kahoy sa mga bakanteng luna sa kabarangayan sa dakbayan sa Lapulapu maoy nag-una sa mga programa nga gitinguha ni Association of Barangay Council (ABC) federation president Leo Mercado.
Si Mercado sa iyang pamahayag sa mga tigbalita miingon nga nakigsabot na siya sa mga kapitan sa 30 ka barangay sa dakbayan nga nga ang tanang luna nga bakante sa ilang barangay kinahanglang patuboan og mga kahoy.
Kini naglakip sa 11 ka barangay sa isla sa Olango ug 19 ka barangay sa mainland sa maong dakbayan.
Matud pa niya nga sa ilang pakisusi nga gihimo sa mga barangay kapitan, iyang nasuta nga daghan pa kaayong mga bakanteng luna sa ilang mga lugar ug gusto nilang katamnan og mga kahoy.
Gitataw ni Mercado nga kining maong lakang maoy ilang suporta kang Mayor Paz Radaza kansang programa naghigpit pagpatuman sa environmental protection program.
Si Mercado kinsa nasublian sa pagkapili nga barangay kapitan sa barangay Pajo, nasublian usab pagkapili isip ABC federation president ug naglingkod isip ex-officio member sa konseho sa maong dakbayan.
Busa matud pa ni Mercado nga sama sa higpit nga pagpatuman sa pagpangolekta sa basura, ingon usab niini ka higpit ang pagpatanom og mga kahoy sa kabarangayan.
Kini aron sa umaabot nga katuigan, mobalik ang pagka-lasang sa maong dakbayan sama niadtong panahon pa ni Lapulapu nga hari sa maong lugar kaniadto. (BANAT NEWS)