Mga negosyante palukaton na'g permit
CEBU, Philippines - Si City Treasurer Regal Oliva sa dakbayan sa Mandaue miawhag sa mga magpapatigayon sa maong dakbayan sa pagsiguro paglukat og business permit sa ilang mga negosyo para sa tuig 2011 aron dili kini makasinati og mga kakulian. Matud pa ni Oliva nga alang sa mag-renew og business permit, sugdan nila ang pagdawat sa mga aplikasyon niini sa Enero 2 hangtod 21, 2011.
Samtang ang mga bag-ong buksan nga negosyo, sa tibuok buwan sa Pebrero nila dawata ang mga aplikasyon sa business permit niini.
Si Oliva miingon nga sa gihimo nilang tax mapping ug tax survey sa kaliboan ka mga patigayon sa 27 ka barangay sa dakbayan, ilang nasuta nga hapit usab katunga sa kaping 1,000 ka patigayon ang wala mokuha og business permit o mayor’s permit.
Dugang pa ni Oliva nga labing kubos lamang kaayo ang pagabayran nga buhis sa mga magpapatigayon sa dakbayan kun itandi sa uban nga mga lugar dinhi sa nasud.
Apan bisan pa sa ka menus nga kantidad nga ilang bayran daghan gyud ang wala magpakabana niini, matud pa ni Oliva.
Gumikan niini gimando niya nga higpiton ang pagpangolekta sa mga buhis sa mga negosyante aron usab mosaka ang kinitaan sa dakbayan.
Ang buhis matud pa ni Oliva maoy dugokan sa syudad sa paghatag og tukmang serbisyo ngadto sa katawhan. (BANAT NEWS)
- Latest
- Trending
