CEBU, Philippines - Gidakop ang usa ka panagatan nga dunay 18 ka mga tripulante apil na ang kapitan human nasakpan sa akto sa mga sakop sa Bantay Dagat ug kapulisan nga ilegal nga nangisda sa kadagatan sa barangay Lapayran sa lungsod sa Bantayan niadtong alas 9:00 sa milabay’ng gabii.
Apil sa gisakmit ang moabot og 120 ka banyera sa lain-laing klase sa isda nga mga dagku ug gagmay gikan sa commercial fishing vessel ng F/B Jaurice nga gipanag-iya sa usa ka Crispin Santillan nga molupyo sa barangay Kabak, Bantayan.
Samtang ang mga nadakpan mao ang kapitan nga si Galicano Dukay Mata, 42, molupyo gihapon sa maong lugar.
Matud ni PO3 Raul Hernaiz sa Bantayan Police Station dihang nahinabi sa Banat News, nakadawat sila og impomasiyon kabahin sa presinsya sa ilegal nga panagatan sa maong lugar.
Daling gisusi sa kapulisan pinangulohan sa hepe nga si Sr. Insp. Florendo Laude Fajardo inabagan sa mga sakop sa Bantay Dagat ug nasakpan sa akto ang maong panagatan nga illegal nga nanagat sa maong lugar.
Ilaha dayon kining gidakop ug gi-hold ang kapitan ug mga tripulante niini ingon man ang panagatan ug gisakmit ang mga kuha nga binanyera nga isda nga gipang-apud-apod sa mga molupyo sa maong lungsod. Ang kapulisan mipasaka na og kaso batuk sa kapitan ug tag-iya sa panagatan samtang girekomendar kini pagpabayad og multa. (BANAT NEWS)