CEBU, Philippines - Nalandig sa tambalanan ang duha ka guwardya nga nagbantay sa usa ka construction site human sila dunggaba sa usa ka trabahante didto sa Nivel Hills, sitio Tangkili, barangay Busay ning dakbayan sa Sugbo kagahapon sa alas 6:00 sa buntag.
Ang mga biktima mao sila si Ranillo Paran, 30, guwardiya sa Madarang Residence Construction ug sakop sa Keeper Security Agency, stay-in ug lumad nga taga Planas Naga, Cebu, ug ang iyang kaubang si Junnifer Singson, 32, pulos minyo, taga barangay Baring lungsod sa Carmen.
Samtang ang suspetsado mao usab si Giovanni Quijano, hingkod, construction worker nga taga Carcar, Cebu.
Sa pasiunang imbestigasyon ni SPO4 Alex Dacua, PO2 Jodan Batucan, PO2 Edario Manatad ug PO2 Regis nasayran nga si Paran nangandam na kay motrabaho na kagahapon sayo sa buntag, dihang nakit-an niya ang suspetsado nga may gikuhang butang sulod sa construction site, busa gipahibawo niya si Singson ug giimbistigar nila ang suspetsado.
Apan kalit lang kining milanit sa iyang kutsilyo ug gihansak sa tiyan ug buko-buko ni Paran. Samtang si Singson nga misuway og uwang nadunggaban usab sa hawak, busa ang duha gihatod dayon ngadto sa Chung Hua Hospital. (BANAT NEWS)