CEBU, Philippines - Human sa 15 ka tuig nga pagkabilanggo giabswelto sa Korte Suprema ang pito sa siyam ka mga gipasanginlang suspek sa usa sa labing linuog nga krimen nga mao ang Vizconde massacre kagahapon nga gilangkuban sa mga anak sa mga prominenteng tawo sa nasud lakip na niini ang anak ni kanhi senador Freddie Webb nga si Hubert Webb.
Ang mga kabanay sa mga suspek mihangop ug mipasalamat sa maong desisyon ug mihulagway nga buhi pa gyud ang hustisya sa nasud bisan paman sa gidugayon una nila kini makab-ot.
Ang Korte Suprema mibotar 7-4-4 kagahapon nga nag-reverse sa mga desisyon sa duha ka lower courts nga nag-ingong sila guilty sa pagpatay sa mga biktima duha ka dekada na ang milabay.
Si Webb giakusahang milugos kang Carmela Vizconde, 18, kinsa gipatay uban sa iyang mga kabanay diha sa ilang balay sa Parañaque niadtong Hunyo 30, 1991. Lakip sa gipatay ang inahan ni Carmela nga si Estrellita, 47, ug manghod nga si Jennifer, 7.
Si Webb uban sa walo ka mga akusado gikombikto ni Paranaque Regional Trial Court Branch 274 Presiding Judge Amelita Tolentino niadtong Enero 2000 tungod sa maong pagpatay. Samtang ang Court of Appeals mipalig-on sa kombiksyon niadtong Disyembre 2005.
Apan ang duha ka mga kauban ni Webb sa maong kaso nga sila si Artemio Ventura ug Joey Filart pabilin pa sa bilanggoan.
Sumala pa sa tigpamaba sa SC nga si Jose Midas Marquez, giabswelto sa korte ang pito tungod sa rason nga "for the failure of the prosecution to rule their guilt beyond reasonable doubt.
They are ordered released from detention unless for another lawful cause," matud pang Marquez.
Ang korte mikwestyon sa kwalipikasyon sa gipresentar nga eye witness nga si Jessica Alfaro, matud pa ni Marquez nga si Jessica Alfaro, usa ka "an NBI (National Bureau of Investigation) agent and not really an eyewitness."
"There were also suspicious details and the quality of testimony shows there are inherent inconsistencies. The supposed corroborations cannot be relied on. There is reasonable and lingering doubt on the guilt of the accused," dugang pa ni Marquez sa report sa GMA News.Tv.
Sa iyang bahin, si Lauro Vizconde, ang bana ug amahan sa mga biktima nagkanayon pagkasayod sa desisyon nga nawagtangan na kini og pagsalig pa sa sistema sa hustisya sa nasud.
"Nangyari na ang aking kinatatakutan... Wala na kong panawagan... Wala nang katarungan dito sa ating bansa," matud pa ni Lauro sa report sa GMA News.Tv kagahapon.
Subling gipasanginlan ni Lauro ang mga sakop sa Korte Suprema nga adunay salaping nalambigit sa maong desisyon. - Gikan sa Wires