CEBU, Philippines - Ang ambassador sa Brunei Darussalam, ang usa sa labing dato nga nasud sa kalibutan mibisita kang Gobernador Gwendolyn Garcia bag-ohay lamang.
Siya si ambassador Malai Hajah Halimah Binti Malai Haji Yussof, uban kang Defense Attache nganhi sa Pilipinas Lt.Col. Haji Alirumpende Bin Haji Parudin ug sa Royal Brunei Navy nga gipangulohan ni Royal Brunei Navy head delegate Col. Haji Othman Bin Haji Suhari nga mikurtesiya kang Gobernador Garcia.
Ang mga opisyal sa Brunei mipahibawo kang Gobernador Garcia kalabot sa usa ka semanang pagbansay sa mga sundawo sa Royal Brunei Navy ug sa Philippine Navy nga ipahigayon sa kadagatan dinhi sa lalawigan sa Sugbo.
Gitawag nila nga exchange training and enhancement camaraderie, ang maong pagbansay-bansay , salmotan sa 56 ka mga opisyal sa Royal Brunei Navy nga tumbasan usab kini sa puwersa sa mga navy dinhi sa nasud sumala ni Naval Force Central (NAVFORCEN) Commander, Commodore Armando Guzman.
Miingon si Guzman nga mokabat sa 130 ka mga Philippine Navy officer and personnel gikan sa nagkadaiyang rehiyon sa nasud ang musalmot usab sa maong pagbansaybansay.
Gani tag- duha ka barko sa navy sa Pilipinas ug Brunei ang gamiton alang sa maong training.
Naglaraw usab ang ambassador sa Brunei Darussalam nga tukoron ang sisterhood agreement tali sa Brunei ug lalawigan sa Sugbo. – BANAT NEWS