Magsisibya gipakitaa'g armas nahadlok

CEBU, Philippines - Misumbong sa kapolisan sa Presinto 2 sa Cebu City Police Office ang usa ka magsisibya sa radyo human siya pakitaa og mga armas sa wala hiilhing mga tawo samtang nagsakay siya sa iyang sakyanan didto sa Juana Osmeña Street, ning dakbayan sa Sugbo kagahapon sa alas 12:30 sa kaadlawon.

Ang maong magsisibya mao si Jason Monteclar, 29, kinsa mipadayag sa iyang kahadlok pagkakita niya sa mga armas sa mga tawong migawas sa usa ka awto nga nagbabag sa karsada.

Gibutyag sa biktima nga nagpadagan siya sa iyang sakyanan gikan sa East Capitol luwan ang iyang hinigugma dihang pag-abot nila sa Juana Osmeña Street kalit lang mi-overtake ang usa ka itom nga awto ug mibabag sa ilang agianan.

Unya matud pa niya nga migawas ang mga lalaki gikan sa awto unya mipa-display dayon sa ilang armas de fuego ug granada.

Sa iyang kabalaka misumbong siya sa polis, samtang gipangita usab dayon sa mga polis ang maong mga tawo aron sayron kun mopatay ba sila o kaha igo lang mipa-display sa ilang armas. (BANATNEWS)