CEBU, Philippines - Wala mapahimusli sa mga kabus sa lungsod sa Dumanjug ang tunga sa milyon ka pesos nga pundong gihatag ni Senador Juan Miguel Zubiri sumala pa sa report sa Commission on Audit.
Sumala pa sa COA ang pundo gidapat sa pagpanindot sa Dumanjug Golden Friendship Gym imbes nga sa mga programa sa gobiyerno alang sa mga kabus nga gihatag ni Zubiri niadtong tuig 2008.
Ang COA nangayo na og katin-awan sa mga opisyal sa lungsod nganong wala gamita ang pundo sa orihinal nga katuyoan niini.
Gipasabot sa COA nga mausab lang ang katuyoan sa gastohan sa pundo kung may pagtugot gikan sa naghatag niini.
Unang buhaton sa mga opisyal sa lungsod ang pagpasar og resolusyon nga maghangyo sa senador nga usbon ang katuyoan nga gastuhan sa pundo.
Apan matud pa sa COA nga wala kini himoa sa mga opisyal ug nagpabiling nahikawan ang mga kabus sa mga benepisyo nga ikahatag unta sa maong pundo ngadto kanila. (BANATNEWS)