Mag-uuma giluba sa silingan

CEBU, Philippines - Samaran sa nagkadaiyang bahin sa lawas ang usa ka mag-uuma human kini dunggaba sa iyang silingang mag-uuma usab sa sitio Baksan, barangay Sapangdaku, ning dakbayan sa Sugbo sa miaging gabii.

Ang biktima mao si Nestor Mancia, 38, minyo, samtang ang suspetsado mao usab si Cristobal Ragasajo, 48, minyo sab, nga pulos taga Baksan.

Matud pa sa kapolisan nga sa wala pa mahitabo ang pagpanunggab hubog si Ragasajo nga nahiabot sa balay sa biktima.

Gumikan kay managsilingan, giagda kini sa biktima og panihapon ug human mabusog, gihangyo na siyang papaulion na aron makapahuway.

Apan inay nga magpasalamat kay nabusog na ug mosanong sa hangyo sa biktima, mihiwasa hinuon kini sa kasuko dayong lanit sa iyang gitangkil nga kutsilyo ug giligid og dunggab ang biktima.

Maayo nalang kay nakapanagang ang biktima, wala kini maintimano apan natusak sa mga samad ang iyang walang bukton, siko ug dapidapi.

Samtang gihatod sa tambalanan ang biktima, gisikop usab sa mga barangay tanod ang suspetsado. (BANAT NEWS)