CEBU, Philippines - Duha ka babayeng masahista sa usa ka massage parlor ang nangaangol human natagakan sa bildo sa usa ka diskohan nga gidaro sa usa ka sakyanan kagahapon sa kaadlawon diha sa dalan Mango Avenue sa barangay Camputhaw dakbayan sa Sugbu.
Si PO3 Armando Bañoc, imbestigador sa traffic division sa Cebu City Police Office nga nahinabi sa Banat News miila sa duha ka biktima nga sila si Arlene Barete, 23, ug Floramie Bautista, 20. Ang duha nakagawas hinuon dayon sa tambalanan human natambalan ang ilang samad sa bitiis ug tiil.
Usa ka Don Edrian Terol, 25, taga North Town Homes sa barangay Cabancalan, dakbayan sa Mandaue ug nagmaneho sa usa ka Lexus Sedan nga nagtangag sa plakang GLB 222 maoy nidasmag sa Hot Rod Gentleman’s Club.
Matud pa ni Bañoc nga kusog nga nagpadagan si Terol subay sa Mango Avenue ug pag-abot tungod sa maong club giingong adunay kalit misira nga jeepney nga gikan nagpakanaog og pasahero sa iyang atubangan.
Misuway paglihay si Terol sa maong jeepney ug gilubag ang manobela sa tuong bahin apan natapsingan gyud ang jeepney ug nalahos sa Hot Rod Gentleman’s Club.
Lakip sa nadasmagan ni Terol ang traffic sign, electric meter, diin sila si Barete ug Bautista magbarog nga padulong nang mo-report sa ilang trabaho.
Giingong nakigsabot kang Terol ang duha ug gipasaligang abagahon ang nagasto sa tambalanan. (BANAT NEWS)