CEBU, Philippines - Pormal na nga buksan karong hapon ang tinuig nga kalihukan sa kagamhanan sa siyudad sa Sugbo nga mao ang “Pasko sa Sugbo” sa Fuente Osmeña Circle.
Dungan niini ipahigayon usab sa maong dapit ang pagpasiga sa dakong Christmas tree nga gitarok sa banay nga Lhuillier nga sundan usab sa firework display.
Mokabat sa P900,000 ang gigahing maggasto sa siyudad alang sa maong kalihukan nga motak-op unya sa Disyembre 30.
Matud pa sa tsirman sa Cebu City Youth Development Council nga si Konsehal Sisinio Andales nga tumong sa maong kalihukan mao nga pagpabilin nga sadya ang siyudad sa nagsingabot nga Pasko ug gitataw niya nga libre ang mga gihatag nga serbisyo sa mga nagkadaiyang performer alang sa maong kalihukan.
Masaksihan matag gabii ang mga pasundayag nga idalit sa nagkadaiyang tulunghaan, kompaniya, organisasyon nga nagbase sa dakbayan.
Dugang pa sa konsehal nga iya gyud nga gipaniguro nga malingaw ang mga tawo nga moduaw sa Fuente Osmeña matag gabii sanglit pulos de kalidad ug pulos may maayong abilidad ang mga dinapit nga mga tawo nga mopasundayag sa matag gabii nga kalihokan.
Samtang si Mayor Michael Rama mipahayag usab nga pinaagi sa Pasko sa Sugbo , masud-ong ang nagkalainlaing talento sa mga Sugbuanon
Dugang pa sa mayor nga kinahanglang mahimong aktibo ang mga kabatan-onan karong panahona sa mga socio-cultural activities aron mabaid usab ang ilang mga abilidad o talento. (BANATNEWS)