Mga opisyal sa barangay sa Mandaue nanumpa

CEBU, Philippines - Himabaw sa 500 ka mga opisyal sa barangay uban sa Sangguniang Kabataan (SK) ang nanumpa sa ilang katungdanan atubangan ni Mayor Jonas Cortes didto sa Cebu International Convention Center (CICC) niadtong Lunes sa hapon.

Matud pa ni Mayor Cortes nga ang mga nanumpa sa ilang katungdanan naglangkob sa 27 ka mga kapitan, uban ang tanang konsehal sa 27 ka barangay, ug sa 27 ka tsirman sa SK uban sa mga konsehal sa mga batan-on gikan sa tanang barangay sa Mandaue.

Gikalipay kaayo sa mayor nga walay kulang ang tanang napili nga mga nangatungdanan sa barangay ug sa SK sa 27 ka barangay sa maong dakbayan nga misalmot sa maong hinugpong nga oathtaking.

Nasayran usab gikan kang Mayor Cortes nga ang bugtong kapitan nga oposisyon nga miduyog sa pagpanumpa kagahapon mao si Liza Ouano y Calina kinsa mipildi sa iyang igsuon nga si Joy Ouano, ang kanhi kapitan sa barangay Opao.

Matud pa sa mayor nga ang pagkuyog ni kapitan Calina sa grupo sa mga kapitan sa administrasyon nagpasabot nga andam na siyang mopasilong sa landong sa administrasyon karon.

Gani mahinumdoman matud pa sa mayor nga pagkahuman sa election sa barangay niadtong Oktrobre 25, ug naklaro na ang kadaogan ni Calina, ang iyang amahan mismo nga si kanhi Mayor Alfredo “Pedong” Ouano sa Mandaue maoy mikuyog kaniya ngadto sa buhatan ni Mayor Cortes pagsaludo o pag-courtesy call sa mayor.

Sa iyang mensahe ngadto sa tanang nanumpa sa katungdanan, si Mayor Cortes mipahinumdom kanilang tanan nga utang nila ang ilang katungdanan sa mga katawhan nga mipili kanila niadtong milabay nga eleksyon.

Busa katungdanan usab nila nga ihatag ang tukmang serbisyo sa walay pagpinig sa pagkatawo, relihiyon, prinsipyo ug kultura sa katawhan nga ilang alagaran aron dili sila mapakyas sa ilang gilauman gikan sa ilang gipili nga mga opisyal sa barangay uban sa mga opisyal sa kabatan-onan niini.

Bisan si Msgr. Arthur Navales mipahinumdom usab sa tanan nga angay nilang basehan ang kinabuhi ni Cristo, nga alang-alang sa mga tawong iyang gimahal ug gialagaran, gimalasakitan niya kini ug labaw sa tanan wala niya igsapayan ang iyang kinabuhi pinaagi sa pagbuhis niini pinaagi sa kamatayon didto   sa kruz.

Sa maong kalihokan mitambong usab si kanhi Mayor Pedong Ouano, Kongresista Luigi Quisumbing sa ika-6 nga distrito sa lalawigan ug DILG Officer sa Mandaue nga si Joaden Lucero.

Pipila sa mga kapitan nga nanumpa miingon nga ang ilang nasaksihan nga kalihukan niadtong Lunes sa gabii maoy yawe nga magbukas sa ganghaan alang sa “One Mandaue” kun “Usa ka Mandaue”. (BANATNEWS)