CEBU, Philippines - Giaprobahan na sa konseho sa dakbayan sa Mandaue ang resolusyon nga gisumiter sa City Disaster Coordinating Council (CDCC) nga nagpaubos sa state of calamity sa sitio Cabildohan sa barangay Looc ug sitio NKKP sa barangay Pagsabungan sa maong dakbayan nga pulos naigo sa sunog.
Ang pagdeklarar sa state of calamity sa maong duha ka dapit sa maong dakbayan gihimo atol sa regular session sa konseho sa miaging adlaw.
Ang konseho nga gipangulohan ni Bise Mayor Glenn Bercede nga maoy presiding officer naghatag usab og pagtugot kang Mayor Jonas Cortes sa paggahin og salapi nga ihinabang sa mga nasunogan aron ipamalit og mga housing ug construction material.
Kahinumdoman nga ang sitio Cabildohan sa barangay Looc, naigo sa sunog alas 8:28 sa buntag sa Oktobre 28 niining tuiga diin mikabat og 25 ka pamilya ang nawad-an og balay ug nagbilin kini og danyos nga mokabat sa P400 kapin.
Samtang sa sitio NKKP sa barangay Pagsabungan nasunog gihapon sa alas 7:30 ang takna sa buntag niadtong Nobiyembre 13 ning tuiga diin 17 usab ka balay ang naugdaw. - Romeo T. Limpangog (BANATNEWS)