Mga gobernador moprotiher sa kadagatan sa Visayas

CEBU, Philippines - Ang mga gobernador sa lalawigan sa Sugbu, Masbate, Ilo-ilo ug Negros Occidental bag-ohay lamang nga mipirma og declaration of commitment and action plan aron gamiton ang ilang gahom pagpreserbar ug pagprotektar sa kadagatan dinhi sa Kabisay-an.

Nahimo ang maong hiniusang kasabutan didto sa Carbin Reef sa Sagay City, Negros Occidental niadtong nakalabay nga adlaw nga gitambungan nila ni Gob. Gwendolyn Garcia sa Sugbu , Gob. Arthur Defensor sa Iloilo, Gob. Alfredo Marañon Jr. sa Negros Occidental ug Ret. Gen. Darius Tuazon kinsa maoy nagrepresentar kang Gob. Rizalina Lanete sa Masbate.

Ang deklarasyon gisaksihan usab ni Atty. Antonio Oposa Jr., usa ka international environmental lawyer ug presidente sa Visayan Sea Squadron.

Sumala pa ni Oposa nga nalakip sa maong deklarasyon nga gipirmahan sa mga gobernador mao ang mga stratehiya unsaon paghimo ang aktibong pagkonserbar, pagprotektar ug pagpabalik sa kahimsog sa kadagatan sa Visayas.

Unang lakang nga nasabutan mao ang pagsumpo sa ilegal nga panagat. Adunay labing unang summit batok sa ilegal nga panagat karong Pebrero sa sunod tuig nga tambungan sa dili muminus sa 20 ka mga mayor sa Kabisay-an. (BANATNEWS)