Kamot sa 'boring' adto sa bulsa, lolo nabiktima

CEBU, Philippines - Igo nalang midangop sa buhatan sa kapolisan sa Carbon Police Station ang usa ka biyudo human siya nakawatan sa iyang kwarta sa iyang gi-abangan mga babayeng mubo og lupad.

Ang biyudo nagpangidaron og 66-anyos ug nagpuyo kini sa Guadalajara Compound barangay Guadalupe.

Base sa saysay sa biktima ngadto sa buhatan sa kapolisan nga sa miaging adlaw nianang pagkagabii mga alas-10 samtang nagbaklay siya sa downtown iyang gikahimamat ang babayeng mubo og lupad nga nagpaila lang sa ngalan nga Susan.

Giingong gi-agni siya niini nga ilang saw-an ang lawasnong kalipay hinungdan nga iya unang gidala ang babaye sa usa ka restaurant ug nangaon sila samtang tunga-tunga sa ilang pagpangaon nagkasinabot sila nga manulod og usa ka lodge.

Tuod man miadto sila sa usa ka lodging house sa Leon Kilat st. barangay Pahina Central ug didto sulod sa kwarto giingong gipalong sa suspetsado ang suga ug mihinay-hinay na kini og hinol sa paa nga bahin sa biktima.

Apan nakurat nalang ang biktima dihang sa iyang bulsa padulong ang mga kamot sa babaye ug gikuha ang iyang kwarta nga P600 ug diha-diha mibarog ang biktima apan gitukmod kini og balik sa babaye.

Human niini mikaratel ang suspek og gawas sa lodge ug wala na igkita pa sa maong tiguwang hinungdan nga midangop nalang kini sa kapolisan. (BANAT NEWS)