Bana sa ig-agaw ni Angel Locsin gikiha

CEBU, Philippines - Pormal nang gipasakaan og kasong parricide ang bana sa gipatay nga ig-agaw sa artistang si Angel Locsin diha sa piskalya sa lungsod sa Carcar kagahapon.

Ang gipasakaan og kasong parricide mao si Fernando Sansan nga bana sa biktimang si Rachelle Marie Colmenares Salvador Sansan, kinsa giingong ig-agaw ni Angel Locsin.

Kahinumdoman nga ang suspetsado nga usa ka dakong negosyante   gipasanginlang miluba kang Rachelle niadtong Nobiyembre 5 nianang buntag sulod sa ilang panimalay sa barangay Perrelos.

Giingong selos ang hinungdan sa maong krimen. Ang suspek wala na mopakita ug padayong gipangita sa mga awtoridad. Si Atty. Rey Acosta, legal nga abogado sa biktima, inubanan sa kwerpo sa kapulisan sa Carcar maoy mipasaka sa kaso diha sa Carcar Prosecutors Office. Sa pakighinabi sa Banat News kang PO2 Alex Buanghog, siya mibutyag nga padayon pa nilang gipangita si Fernando lakip na diha sa mga tugpahanan ug mga pantalan sa lalawigan.

 Samtang ang talent manager ni Angel Locsin nga si Ethel Ramos mibutyag nga ang aktres miawhag sa mga lokal nga awtoridad nga buhaton ang tanan aron mahatagan og hustisya ang kamatayon sa iyang ig-agaw.   - Monnahlie G. Olandria, Ma. Gladys Alterado ug Kristel Cordero (BANAT NEWS)