Carnapper nadakpan sa Pinamungahan

CEBU, Philippines - Duha ka carnapper kinsa misakiyo sa motorsiklo sa taga barangay Guadalupe, dakbayan sa Sugbo sa miaging Miyerkules sa kaadlawon nadakpan sa kapolisan didto sa lungsod sa Pinamungahan nianang pagka-Huwebes sa hapon.

Ang mga suspetsadong carnapper giila sa kapolisan nga sila Eric Panuncillon alyas Tarzan, ug Benedict Jacalan, pulos tag 19 ang edad ug pulos ulitawo nga managsilingan sa barangay Pandacan, lungsod sa Pinamungahan.

Ang duha ka mga suspetsado maoy nagsakiyo sa motorsiklo ni Jasper Rama, usa ka drayber sa habal-habal nga taga Sitio Guneco, Brgy. Guadalupe, dakbayan sa Sugbo.

Ang pagpangarnap nahitabo dihang misakay ang maong mga suspetsado sa motorsiklo nga gihimong pamasaheroan isip habal-habal sa biktima.

Samtang nagdagan ang motorsiklo sa dalan Andres Abellana sa Guadalupe, kalit gitionan sa ilang armas de fuego ang biktima ug mideklarar nga tulis.

Wala kuhai og kuwarta ang biktima, apan ang iyang motorsiklo maoy gisakiyo sa duha kinsa dali kaayong nakapahilayo sa maong dapit sakay sa motor sa biktima.

Si SPO1 Galo Amper ug si PO3 Eddie Miego mibutyag sa Banat News nga human nila masayri ang nahitabo sa biktima, mihimo dayon sila og hot pursuit operation ilabi na dihang nasayran nila nga taga Pinamungahan ang carnapper.

Human nila masikop si Panuncillon sa ilang balay didto sa Pandacan, giposasan nila kini samtang misakay sila og bus pasaheroan paingon sa dakbayan sa Sugbo.

Apan samtang nagdagan ang sakyanan, pipila ka gutlo, misakay usab si Jacalan sa maong sakyanan nga walay kalibutang nasikop na si Panuncillon ug nagsakay na niadtong higayona sa maong bus.

Busa dihang nakita siya ni Panuncillon, dali kaayo kining nakasulti sa kapolisan nga ang bag-ong misakay nga si Jacalan maoy iyang kauban sa pag-karnap sa motor.

Misuway pa unta paglayat sa trak si Jacalan apan wala kini makaugpo gumikan sa kaabtik sa kapolisan nga mikupot kaniya.

Ang duha nagtingkagol na karon sa prisohan sa kapolisan sa Guadalupe, samtang giandam na ang kaso batok kanila. – BANAT NEWS