CEBU, Philippines - Human sa pagkalupig sa Sugbu sa Camarines Sur isip labing nindot nga suroyan sa mga langyaw ug lokal nga turista ning milabay’ng mga buwan nakapaalarma kini sa mga lokal nga opisyal sa Sugbu.
Usa na niini si Gob. Gwendolyn Garcia kansang pagpalambo sa turismo sa lalawigan sa Sugbo maoy usa sa gihatagan og patagad milusad og daghang mga kalihukan aron mapalambo pa kini.
Nagbunga hinuon ang maong tinguha human mapilian ang nasud sa Pilipinas nga maoy lugar alang sa Crossing Bridges 2010 ug ang Cebu maoy nasentro sa ilang pokus.
Matud pa ni Provincial Board Member Agnes Magpale ang chairperson sa committee on tourism sa Hunta Probinsiyal nga ang mga Asian photographers mipili sa Sugbu nga maoy lugar nga kuhaan og mga hulagway sa mga dapit nga tourist destinations nga wala kaayo maila sa tibuok nasud ug sa Asya.
Sumala pa ni Magpale nga nakadawat ang buhatan ni Garcia og sulat gikan ni chairperson sa Federation of Philippine Photographers Foundation Inc. nga si Eduviges Huang nga naghangyong mopahigayon og laing hugna sa Suroy-Suroy Sugbo. Nunot niini sa maong oportunidad ang kagamhanan sa lalawigan sa Sugbo nagsugod na karon sa pagpangandam alang sa himuong special “Suroy-Suroy sa Sugbu” alang sa maong organisasyon.
Tuyo nga destinasyong pabisitahan sa mga photographers ang Aloguinsan, Pinamungajan, Toledo, Tuburan, Asturias, Tabuelan ug Balamban.
Kini tungod kay nasuta sa gobernadora nga maayo nga kuhaan og hulagway ang maong mga lungsod base sa nakuha niining feedback gikan sa mga nakaapil sa pinakabag-ong Suroy-suroy sa Sugbu niadtong nakalabay nga bulan.
Gibutyag usab ni Magpale nga adunay 89 ka mga photographers nga nagagikan sa mga nagkadaiyang nasud sa Asya diin gilangkuban sa 20 ka mga photographers sa Pilipinas, 14 sa Singapore, og tag-16 sa nasud Malaysia, Indonesia ug Vietnam nga manganhi.
Naglaom si Magpale nga mosulbong pa ang turismo sa lalawigan pinaagi niining promosyon nga himuon sa mga photographers isip sukli sa kooperasyon nga gihimo sa kagamhanan sa lalawigan sa Sugbo alang kanila. – BANAT NEWS