CEBU, Philippines - Mikapin sa 50 ka mga tulunghaang publiko ug pribado dinhi sa dakbayan sa Sugbo ang misalmot sa “Light A Star”, usa ka Lantern-Making Contest sa The Freeman.
Gilusad sugod niadtong Nobiyembre 11 hangtod 12, 2010, ang mga misalmot sa maong bangga naglakip sa 18 sa elementary category - first batch, 13 sa elementary category - second batch ug 14 sa high school category.
Sa unang higayon sa ika-tulo na ka tuig sa lantern-making contest ,nga on-the-spot sa pagbuhat sa mga parol, ang maong bangga gisugdan sa alas 8:00 sa buntag hangtod sa alas 12:00 sa udto alang sa elementarya ug ala 1:00 ngadto sa alas 5:00 sa hapon alang sa high school.
Ang gigamit nga mga material sa mga contestant sa elementarya mao ang nagkalainlaing putos sa candy, samtang mga CD’s ang sa high school.
Tulo ra ka mga estudyante sa matag eskuwelahan ang gitugotan sa pagsalmot sa nahisgutang contest.
May mga tulunghaan nga mao pay pagsalmot sa maong bangga sama sa Bankal National High School.
Si Rodel Roque, estudyante sa maong eskuylahan naglaom nga makadaog siya.
Matud pa usab niya nga ang mga CD’s nga ilang gigamit mga inamot usab sa ilang mga classmate. Ang mag-unang 10 kun top 10 maoy mananaog sa maong bangga ug ang pito niini makadawat sa mga consolation prizes.
Sa Top 3, sa elementary category, ang 1st place makadawat og P10,000, 2nd place P8, 000 ug 3rd place P5,000 .
Sa high school, ang 1st place makadawat og P15,000, 2nd place P10,000, ug ang 3rd place P7, 000.
Ang pre-judging ipahigayon unya sa Decembre 2, ug ang final judging himoon sa Decembre 4, 2010. (BANAT NEWS)