Polis gitukmod samtang nagsilbi og warrant natuwad

CEBU, Philippines - Usa ka polis kinsa mi-serve og warrant of arrest natumba sa yuta human kini giingong gitukmod sa amahan sa suspetsado nga gisilbihan sa warrant didto sa sitio Tiguib, barangay Lagtang,dakbayan sa Talisay, niadtong Biyernes sa gabii.

Ang biktima mao si PO3 Arnold Damasco, warrant server sa Talisay City Police Station kinsa uban nila ni PO1 Analito Indoy ug PO1 Jennis Lamosao nga mag-serve unta sa WOA batok kang Jonnel Planga Abatayo, residente sa nahisgutang dapit.

Si Abatayo nag-atubang og kasong attempted homicide sa sala ni Judge Mario Manayon sa Municipal Trial Court in Cities sa dakbayan sa Talisay.

Ang nanukmod sa polis mao si Junie Abatayo, 49, nga nagpuyo usab sa maong lugar kay mibabag kini aron dili masikop ang iyang anak.

Hinuon nagtingkagol na siya karon sa Talisay City detention cell ug gipasaka kagahapon sa mga polis ang kasong Obstruction of Justice ug Disobedience batok sa maong amahan didto sa Talisay City Prosecutors Office.

Si Damasco nga nahinabi sa Banat News kagahapon mibutyag nga tungod sa gibuhat ni Junie, ang anak niini nakaikyas ug wala nila masikop.

Pag-abot nila didto sa balay sa suspetsado mibabag ang amahan sa suspetsado dihang nagpaila sila nga mga polis ug mipakita sa warrant of arrest batok kang Jonnel, apan wala makabantay si Damasco dihang gikalitan siya og tukmod ni Junie hinungdan nga nahagba siya diha sa yuta.  – BANAT NEWS