CEBU, Philippines - Napusilan patay sa usa ka construction worker ang 39-anyos nga lalaki human gisukmag ang asawa sa suspek atol sa ilang panaglalis diha sa barangay Inuboran lungsod sa Naga niadtong Domingo sa alas 7:00 sa gabii.
Ang biktima nga namatay gyud samtang gitabang sa mga mananambal sulod sa tambalanan mao si Petronilo Alfar, 39, molupyo sa nahisgutang lugar samtang ang suspek mao ang silingan niining construction worker nga si Edelberto “Boyet” Paunel, 48, nagpuyo sa maong dapit.
Matud pa ni PO2 Ken Cabrera sa Naga Police Station dihang nahinabi sa Banat News nga ang asawa sa suspek ug ang biktima naglalis ug wala makapugong ang biktima ug gisukmag ang ginang.
Ang suspek nga diha sa tupad wala makaantos nga gidapatan ang iyang asawa mibunot dayun kini sa armas nga wala matino ang kalibre dayung pusil sa biktima.
Ang biktima nga distansiya lang og gamay sa suspek maayong pagkaigo sa walang bahin sa dughan ug nahagba ug gitabang sa mga silingan ug gihatud sa South General Hospital sa maong lungsod.
Apan pagka-alas 10:00 sa gabii adtong Domingo namatay gyud kini samtang gi-atiman sa mga doktor.
Sa paghimo ning balita padayon pang gipangita sa kapulisan ang suspek nga abtik usab kaayung nakasibat pahilayo human sa hitabo. (BANATNEWS)