CEBU, Philippines - Nakasinati og duha ka adlaw nga blackout ang tibuok isla sa Bantayan atol sa adlaw sa minatay gikan sa Nobiyembre 1 hangtud kagahapon sa buntag.
Gikonpirmar sa manager sa Bantayan Electric Cooperative (BANELCO) Oscar Siares atol sa interview sa Bantay Radyo nga nagsugod ang maong blackout alas 3:00 sa hapon niadtong Lunes ug kagahapon na sa alas 11:00 sa buntag nahibalik ang normal nga supply sa kuryente.
Ang hinungdan matud pa ni Siares mao ang kalit lang nga pagkapawong sa makina sa ilang planta nga wala dayun masakpi ang depekto sa ilang mga engineer hinungdan nga milanat gyud og duha ka adlaw una nahibalik sa normal ang ilang operasyon.
Apan ang kawani sa mayor’s office sa lungsod sa Sta. Fe nga si Nonoy Bariolen mitug-an nga ang lungsod ra sa Sta Fe ug Madredijos lang ang nakasinati sa maong blackout tungod kay may supply man sa kuryente ang Bantayan.
Kini gidasonan usab sa usa ka dakung opisyal sa lungsod sa Madridejos nga nagdumili lang pagpaila sa iyang ngalan.
Apan gipanghimakak ni Siares ang maong estorya nga may suga ang lungsod sa Bantayan sa adlaw sa minatay gumikan kay hingpit mang paralisado ang ilang operasyon niadtong higayona, apan hinuon may pipila ka industriya sama sa hospital sa Bantayan nga nagpabiling may suga kay nakapaandar man kini sa ilang generator.
Dugang reklamo batok sa Banelco mao ang kapakyas niini sa pagsabwag og abiso nga mapawong sila sa tibuok adlaw sa minatay aron unta sila makapangandam.
Apan matud ni Siares kalit kaayo ang pagkaguba sa makina sa ilang planta unya wala dayon ma-repair gumikan sa kapakyas sa mga engineer sa pagtumbok sa depekto. – BANAT NEWS