3 sakyanan nagbangga 1 tipi, 7 angol

CEBU, Philippines - Patay ang usa ka 59-anyos nga lalaki ug laing pito usab ang grabeng nangaangol human ang sakyanan nga ilang giluwanan kalit lang nga gisungag sa Mitsubishi Fuso Canter ang tulo ka mga sakyanan diha sa barangay road sa Labogon ug dalan National sa Mandaue alas-7 pasado ang takna sa miaging gabii.

Ang namatay mao si Chiong Sian Ang Sy Kho, 59, taga Sacris Road Extension sa barangay Banilad sa maong dakbayan nagsakay sa Isuzu Hi-lander Wagon nga nagdala sa plate number GLY-810 nga gimaneho ni Fothong Ong Sy Kho, 51, nga nagpuyo sa maong dapit.

Ang nangaangol nga nagluwan sa maong sakyanan mao sila si Jessie Burton Sia Sy, 18, Jean Sia Sy, 58 ug Emilia Pepito, 32, nga taga dalan Sacris sa barangay Banilad sa mao gihapong dakbayan.

Dugang naangol mao ang mga pasahero sa multicab nga pasaheroan nga gimaneho ni Mario Amit Abarquez, 48, nga sila si Solidad Yanson Mancio, 52 nga taga Mantuyong, Arthur Dano, 31, nga taga Tres Rosas sa barangay Alang-Alang, Stephen Estanero Dano, 8 ug Roden Fiel Rujo, 46 nga taga San Miguel Village sa Phase 2 sa barangay Basak, dakbayan sa Mandaue.

Si SPO3 Eleasar Saromines, imbestigador sa traffic division sa Mandaue City Police Office (MCPO) miingon nga gikan sa lungsod sa Consolacion ang multicab nga pasaheroan ug kalit lang kining gisungag sa Mitsubishi Fuso Canter nga gimaneho ni Lorenzo Sanchez, 31, taga Zone Mongos sa barangay Paknaan sa maong dakbayan nga gikan pa sa dakbayan sa Sugbo nga kusog usab nga nagdagan.

Nunot sa maong panagsungag, ang Isuzu Hi-Lander nga nagsunod sa canter paingon gihapon sa lungsod sa Consolacion naigo usab sa trak ug nakaingon sa grabeng kadaut sa sakyanan ug sa mga nagsakay niini nga mga Tsinoy.

Si SPO3 Saromines miingon nga daling gidala sa Mandaue City District Hospital ang mga biktima apan si Chiong Sian Ang Sy Kho gideklarar sa doktor sa maong tambalanan nga dead on arrival. (BANATNEWS)